प्रति गोणी २०० ते २५० रुपयांनी वाढ; शेतमालाला भाव नाही, पण उत्पादन खर्चात प्रचंड भर पडल्याने शेतकऱ्यांमधून तीव्र नाराजी.
सततच्या दरवाढीने शेतकरी चिंताग्रस्त
गेल्या काही वर्षांपासून रासायनिक खतांच्या किमतीत सातत्याने वाढ होत असल्यामुळे राज्यातील शेतकरी चिंतेत आहेत. चालू हंगामातही खतांच्या किमतीत मोठी वाढ झाल्याने शेतकऱ्यांच्या चिंतेत आणखी भर पडली आहे. आगामी हंगामासाठी शेतीचे नियोजन करताना शेतकऱ्यांना मोठे आव्हान उभे राहिले आहे, कारण वाढलेल्या खर्चानुसार उत्पन्नाचा ताळमेळ जुळत नसल्याची व्यथा शेतकरी मांडत आहेत. अलीकडच्या काळात चांगले उत्पादन घेण्यासाठी रासायनिक खते शेतकऱ्यांसाठी एक महत्त्वाची आणि अनिवार्य गरज बनली आहे.
आर्थिक चक्र कोलमडले
शेतकऱ्यांची ही गरज लक्षात घेता, रासायनिक खतांचे भाव गेल्या अनेक वर्षांपासून सतत वाढताना दिसत आहेत. या दरवाढीमुळे शेतकऱ्यांना मोठा आर्थिक फटका सहन करावा लागत आहे. विशेषतः हंगामापूर्वीच खतांच्या किमती वाढल्यामुळे गोणीमागे २०० ते २५० रुपयांची वाढ झाली आहे. दुसरीकडे, शेतकऱ्यांना त्यांच्या उत्पादन खर्चानुसार शेतमालाला योग्य भाव मिळत नाहीये, ज्यामुळे शेतकऱ्यांचे संपूर्ण अर्थचक्रच कोलमडले आहे. खतांच्या किमती अस्मानाला भिडल्यामुळे सुरू होत असलेल्या हंगामात शेतकऱ्यांचा उत्पादन खर्च प्रचंड वाढणार आहे.
